« وصف الرجال »
الشاعر / عبدالرحمن العجلان - جدة
بعض الرجال اليـوم يسوا قبيلـه
موقف وشيمه كلنا نـعـتــزيبــه
والبعض يتفوّق على ابنـاء جيله
لكن يتعــالى وربـــي حسيــبـه
والبعض منهم مايساوي فتيلــه
خربــوط متهـور ونفسه قــريبــه
والبعـض يـتـملـق وقلبــه غليـلـه
يــرميك في شر الهــوايـل بطيبه
والبعض منهـم من يبيعــك بكيله
يبيـع أصحابـــه وحتى قـــريـــبه
ومنهم النشمي وليــــد الأصيله
يجعل من قلــوب العــذارا لهيبه
ورفقــة الأنــذال دايــم ذليــلــه
تعرّض الجاهــل لا أكبر مصيبه
أحذر تماشي من يردلك فشيله
ولا تسايــر من دروبـه مـريبـه
واحذر تكن في يوم مثل الهبيله
تاخــذك نفسك للدروب المعيبه
واحسب حسابك يالذي نرتجيله
يامن يحل المعضــلات الصعيبــه